Husi: Josh Trindade
1.
TMR Timoroan nebe komprende ‘Timoroan nia Susar no Terus’
TMR laos deit ema nebe ‘makan garam’ iha Timor Lorosa’e maibe nia mos senti ona maek nia katar, koto moruk no akar.
Signifika katak TMR iha esperiensia no kuinhesementu nebe klean kona ba
sosiedade Timor ho ninia situasaun no problema sira nebe sira infrenta. Lider
barak mak laiha abilidade ida ne’e. So Timoroan nebe mak senti duni terus Timoroan
ninia lolos mak bele iha senti ida ne’e ho nia fuan. Iha lider barak temi kona
ba Timoroan nia terus no susar. Maibe sira temi iha ‘ibun-tutun’ deit hodi dada
povu nia simpatia atu vota ba sira. Lider sira hanesan ne’e, so bele koalia
Timoroan nia terus no susar maibe sira la sente liafuan ida ‘susar no terus’
ninia sintidu lolos ba Timoroan.
TMR, wainhira koalia kona ba Timoroan nia susar no terus,
laos ho ibun-tutun deit, maibe nia sente ho ninia laran saida mak ida ne’e. TMR
iha abilidade hodi relata ba Timoroan nia terus no susar tamba karakter no
kapasidade nebe nia iha agora, produs husi susar no terus nebe Timoroan hotu
esperiensia ona. Nia mai husi familia nebe kiak husi foho neba. Husi ki’ik
(tinan 4) kedas, nia tenke sai husi uma iha Baguia ba hela ho nia Tiun sira iha Dili. Otas sei joven
hela, nia tama ona iha FALINTIL hodi funu hasoru inimigu. Entaun husi
esperiensia sira ne’e, wainhira ita koalia kona ba ‘Timoroan nia susar no
terus’, nia laos deit hare ho matan, maibe nia senti ho ninia fuan.
2.
TMR la uja ‘biban iha dalan klot’ iha krise 2006 hodi
halo kudeta no sai ditadura
Iha ema barak akuza TMR dehan nia mak responsabliza ba
Krisi 2006. Maibe ida ne’e la los
tamba momentu neba nia halo decisaun ‘militar’ laos decisaun ‘politika’. Decisaun
militar katak ‘semak kontra regras militar nia tenke sai’.
Iha ema balun akuza katak nia iha tendencia atu sai ditadura. Ema sira nebe hasai liafuan
ida ne’e mak ‘lawan politik’ TMR nia no ema sira nebe la kuinhese personalidade
TMR nia. Se TMR hakarak sai ditadura
karik, nia halo tiha ona iha durante krise 2006/7. Se nia hakarak sai ditadura
karik, nia la presija hakolen an hodi resigna an husi nia kargo nudar ema
numeru 1 iha F-FDTL depois mak tuir fali eleisaun, depois se manan eleisaun
karik sei sai ditadura. Se TMR hakarak sai ditadura, nia halo tiha ona ‘kudeta’
iha momentu dalan klot hela. Entaun akuzasaun sira ne’e la los.
3. TMR Hakarak
sai ‘Servi Nain, laos Ukun Nain’
TMR hanesan lider ida nebe uniku tebtebes. Nia iha
karisma nudar lider ideal ba nasaun Timor Lorosa’e. Nia iha kualidade lideransa
nebe Timoroan sira presija. Kualidade nebe nia iha nudar lider diak ida mak
hanesan, ‘TMR ema nebe hatene hakraik an, fo ejemplu diak ba Timoroan seluk,
hatene hakoak no halibur ema hotu, koko bebeik atu kompriende situasaun, bele
rona opiniaun husi parte hotu, nia la gava an dehan nia mak hatene buat hotu, no
nia hakarak atu ‘servi’ povu laos atu ‘ukun’’. So kolonialista deit mak hakarak
ukun, maibe Timoroan tenke hatene ‘servi’, tamba TMR kompriende katak atu sai
presidente republika lolos nia atu “Sai atan ba povu”. TMR ‘servi nain, laos
ukun nain’.
4.
TMR iha vontade diak atu desenvolve Timoroan sira nia
Kapasidade
Iha dokumentu dekralarasaun simu kandidatura ba
Presidente Republika ba Periodo 2012-2017, TMR deklara katak nia sei “dudu
prosesu tranzisaun jerasional hodi fo auto-konfiansa ba foinsa’e sira hodi
hamrik ba oin iha areas hotu-hotu”.
Ida ne’e evidensia ida nebe harudu katak TMR hakarak loke dalan luan ba
Timoroan tomak, liuliu foinsa’e sira atu partisipa iha prosesu konstrui
nasaun-estadu. TMR kompriende katak, atu hadia Rai Timor, papel no kontribusaun
Timoroan tomak esensial tebtebes. Nia fo valor as tebtebes ba Timoroan sira
nebe produs ideia diak ba rai ida ne’e. Laos
TMR nia
objetivu ida mak atu loke dalan hodi produs Timoroan nebe matenek atu
desenvolve rai ida ne’e. Neduni, TMR mai atu loke dalan ba jerasaun foun, laos
5.
TMR Sei Halao ninia Knar Lolos tuir Konstituisaun nia
Mandatu
TMR kompriende katak, atu sai presidente ninia poder tuir
Konstituisaun RDTL limitadu tebtebes. Nia sei koko atu halao deit knar sira nebe
defini ona iha Konstituisaun husi artigu 74 to’o iha 89. Nia sei la interfere
servisu orgaun soberania seluk hanesan Governu, parlamentu no justica nian.
Maibe se ema hili TMR sai Presidente iha periodo ida ne’e,
Nia sei servisu ho orgaun soberania sira seluk hodi hadiak povu nia moris.
Ejemplu, nia labele halao knar Governu nian hodi hadiak povu nia moris, maibe
nia bele innfluensia orgaun soberania sira seluk hodi kria lei no politika hodi
loke dalan ba povu nia moris diak. Vota ba TMR!
6.
TMR sei servisu ho parte hotu-hotu nebe iha hanoin diak atu
desenvolve TL
“Hau mai atu
halibur laos hafahe, se hafahe hau la mai”. Liafuan ida
ne’e TMR hasai iha okasion barak. Sintidu katak, TMR sei servisu ho parte hotu
nebe iha hanoin no planu diak ba povu nia moris diak.
Vantajem diak ida ba TMR mak nia kandidatu independente laos mai
husi partidu ida, mesmu iha prtidu barak suporta nia husi kotuk. Nudar
kandidatu independenti, ida ne’e sei hamamar nia hodi servisu hamutuk ho parte
hotu-hotu. Evidensia hatudu katak, seidauk sai presidente mos nia halibur ona
ema barak. Ejemplu, iha ninia Ekipa da Vitoria (Tim Sukses), iha barak husi
parte oioin mak servisu ba nia. Iha representante husi CNRT, FRETILIN, PD, PSD,
PDN, CPD-RDTL, Sagrada Familia, grupu intellektual, nsst. Grupu ou individual
sira nebe uluk inimigu malu, agora sira dame malu tamba suporta TMR ba
presdiente republika. Nudar ejemplu ida, CPD-RDTL durante ne’e lakohi rejistu
sira nia an atu tuir eleisaun, maibe tamba sira lakohi lakon sira nia vota ba
TMR, entaun sira agora rejistu hotu ona. Ida ne’e evidensia ida nebe hatudu
katak TMR sei hakuak parte hotu no ema sira nebe durante ne’e marjinaladu. Iha
TMR nia Ekipa da Vitoria, iha individual sira nebe iha influensia barak ho masa
hanesan Sr. Lekisera, Sr. Aitahan Matak, Sr. Railos, nsst.
7.
TMR
hakarak hadiak relasaun nebe diak entre Timoroan Sira
Prioridade
ida husi TMR nia programa mak hadiak relasaun entre grupu Timoroan sira,
liu-liu sira nebe hela iha base. TMR iha visaun ida katak, relasaun harmonia entre
Timoroan hanesan fator xave iha nasaun ida ne’e tamba, relasaun nebe diak
kontribui ba unidade nasional, kontribui ba dame no hakmatek, fo dalan ba
desenvolvementu nasional hodi lao ba oin no ida ne’e sei asegura moris diak ba
Timoroan hotu.
8.
TMR sei hametin no hamosu unidade no identidade nasional
ba Timoroan sira
Unidade hanesan fator xave ida nebe nasaun persija hodi
garantia prosesu desenvolvementu nasioanl. Unidade entre Timoroan agora dadaun
iha nivel nasional fraku tebtebes. Nune’e objetivu ida husi TM mak sei promove
valor unidade nasional sira hanesan ‘unidade iha diversidade nia laran’. Iha
kontextu unidade nasional, TMR mos planu atu hamosu filosofia nasaun ninia hodi
fo matan dalan ba desenvolvementu nasional. Unidade nasional sei sai hanesan
politika nasional ida. TMR mos sei loke dalan ba konstrusaun identidade
nasional. Se TMR sai presidente karik, nia sei fo spasu ba fonsa’e sira atu
espresa sira nia an iha dalan nebe positivu, atu nune’e sira bele desenvolve
talentu pesoal nebe sira iha.
9.
TMR Luta ona ba Rai Timor Tinan 36. Fo an ba Timor no
terus hamutuk ho povu ida ne’e
TMR hanesan ema Timoroan ida nebe lori rasik ninia krus
durante luta iha ailaran. Ho ninia terus no sofrementu durante luta iha
ailaran, nia iha lejitimidade atu sai presidente no serve povu no rai ida ne’e.
Ninia sakrifisiu ba rai no povu ida ne’e provas tiha ona. Nia hatudu ona ninia
vontade diak ba povu ida ne’e. Nia sei sai presidente ida nebe diak ba povu, no
sei lori povu ida ne’e ba dalan diak no moris diak. Ita ida-idak bele konta
rasik ninia kontribusaun durante funu hasoru Indonesia iha 24 anos nia laran. Nia
fo ona nia vida ba rai Timor hamutuk tinan 36. Agora nia hakarak fo an hodi
servisu ba rai ida ne’e tinan 5 oin mai nudar presidente republika.
10.
TMR hatene kultura Timoroan nia
Tamba sa ida ne’e importante? Atu sai servi-nain nebe
diak, kestaun ida ne’e importante tebes. Kompresaun TMR nebe diak kona ba
kultura Timoroan nia sei hamamar nia hodi halao ninia servisu rasik. TMR iha
Uma Lulik rasik. Ida ne’e hatudu katak, nia senti orguilhu nudar Timoroan. Wainhira
nia kompriende kultura Timoroan nia, signifika katak nia mos komprende lolos
saida mak Timoroan nia karakter, sira nia mehi no problema nebe sira infrenta.
Iha rasaun barak tamba sa Timoroan sira tenke fo fiar ba
TMR hodi lori no servi rai ida ne’e iha tinan 5 mai. Vota ba TMR signifika vota
ba moris diak no futuru diak, laos deit ba ita nia jerasaun agora, maibe ba mos
ba jerasaun aban bainrua.
VOTA BA TMR!
